ഫോഡില്‍ നിന്ന് ഇതാ ഒരു പുത്തന്‍ സൗരോര്‍ജകാര്‍ . ലാസ് വേഗാസില്‍ നടക്കുന്ന ഇന്റര്‍നാഷണല്‍ കണ്‍സ്യൂമര്‍ ഇലക്ട്രോണിക് ഷോയില്‍ ആണ് 'സി മാക്‌സ് സോളാര്‍ എനര്‍ജി കാര്‍' എന്ന പേരില്‍ ഇത് ആദ്യപ്രദര്‍ശനത്തിനെത്തുന്നത്.
കാറിന്റെ മേല്‍ക്കൂരയില്‍ 1.5 ചതുരശ്രമീറ്റര്‍ വ്യാപ്തിയില്‍ സോളാര്‍ സെല്ലുകള്‍ ഘടിപ്പിച്ചിരിക്കുന്നു. 300 മുതല്‍ 350 വാട്ട് വരെ കപ്പാസിറ്റിയുള്ള സോളാര്‍ പാനലാണിത്. സൂര്യപ്രകാശത്തിന്റെ ശക്തി വര്‍ധിപ്പിക്കാനുള്ള പ്രത്യേകതരം ലെന്‍സുകളും ഇതില്‍ ഘടിപ്പിച്ചിട്ടുണ്ട്.
ഒരിക്കല്‍ ബാറ്ററി ഫുള്‍ചാര്‍ജ് ആയാല്‍ ഈ കാര്‍ 997.79 കിലോമീറ്റര്‍ ഓടിക്കാം. എന്നാല്‍ ഇതില്‍ 33.79 കിലോമീറ്റര്‍ മാത്രമേ സൗരോര്‍ജം ഉപയോഗിച്ച് ഓടാന്‍ കഴിയൂ. (സൗരോര്‍ജത്തില്‍ ഓടുമ്പോള്‍ ഒരു തരത്തിലുമുള്ള വ്യത്യാസമോ പോരായ്മയോ അനുഭവപ്പെടില്ലെന്നതാണ് ഇതിന്റെ ഒരു പ്രത്യേകത). ബാക്കി ചാര്‍ജ് ചെയ്യേണ്ടത് സാധാരണ വൈദ്യുതി ഉപയോഗിച്ചുതന്നെ. ഇതിനുള്ള ചാര്‍ജിങ് പോര്‍ട്ട് കാറില്‍ ഉണ്ട്.
അപ്പോള്‍ ഇതൊരു ഇലക്ട്രിക് കാര്‍ അല്ലേ എന്ന ചോദ്യമുയരാം. അതിനുള്ള ഉത്തരം ഫോര്‍ഡിന്റെ വെഹിക്കിള്‍ ഇലക്ട്രിഫിക്കേഷന്‍ ആന്‍ഡ് ഇന്‍ഫ്രാസ്ട്രക്ചര്‍ ഡയറക്ടര്‍ മൈക്ക് ടിന്‍സ്‌ക്കെ ഭംഗ്യന്തരേണ സൂചിപ്പിച്ചിട്ടുണ്ട്. വാഹനരംഗത്ത് പുതുപരീക്ഷണങ്ങള്‍ നടത്തുന്നവരെന്ന നിലയ്ക്ക് മാലിന്യങ്ങള്‍ കുറഞ്ഞ കൂടുതല്‍ ശുദ്ധമായ ഒരു നാളേക്കുവേണ്ടിയുള്ള ശ്രമമാണിതെന്നാണ് മൈക്ക് പറഞ്ഞതിന്റെ ചുരുക്കം. ഇത്തരം ശ്രമങ്ങള്‍ പൊതുസംവാദത്തിലൂടെ കൂടുതല്‍ മെച്ചപ്പെടുത്തേണ്ടതുണ്ടെന്നും മൈക്ക് പറയുന്നു.
പ്രദര്‍ശനത്തിനെത്തിയെങ്കിലും സി മാക്‌സ് സോളാറിന്റെ വിലയോ മറ്റു വിശദാംശങ്ങളോ ഒന്നും കമ്പനി പുറത്തുവിട്ടിട്ടില്ല.
No comments:
Post a Comment